Escoitar

O Concello amplía ata o 20 de xaneiro a exposición de Colmeiro, Seoane, Picasso e Vertès

A calidade e a boa acollida por parte do público animou ao goberno de Vigo a prorrogala dous meses máis, pasando a formar parte da oferta cultural da cidade para o Nadal. A Casa das Artes reúne case que 200 obras de catro artistas imprescindibles nas correntes de vangarda do século XX, conformando unha mostra “colosal”, en verbas do alcalde.

xoves, 4 nov 2021
Abel Caballero asistiu á inauguración da exposición o pasado 21 de outubro.
Abel Caballero asistiu á inauguración da exposición o pasado 21 de outubro.

“Un humanismo moderno. Colmeiro – Seoane – Picasso – Vertès” abriu as súas portas o pasado 21 de outubro na primeira planta da sede municipal de Policarpo Sanz. Ante a categoría da proposta expositiva e a reacción positiva da cidadanía, o alcalde de Vigo anunciou este xoves a ampliación do seu prazo de apertura durante dous meses máis, ata o 20 de xaneiro.

Abel Caballero explicou que esta “colosal” exposición está a ter unha acollida “excepcional”, polo que o Concello que preside vén de decidir prolongar a súa apertura ata o 20 de xaneiro, pasando a incorporarse á campaña de Nadal da cidade: “Quero ofertar este programa cultural”, afirmou.

Elaborado polo Museo do Gravado de Artes á Estampa Dixital de Ribeira xunto ao Concello de Vigo, a exposición aglutina exemplos do traballo gráfico e de ilustración creados por Colmeiro e Seoane no exilio arxentino na década dos anos corenta do pasado século. Ambos, figuras imprescindibles na arte galega, desenvolveron unha estética con resonancias clasicistas que dialoga á perfección coa famosa “Suite Vollard” de Pablo Picasso (un centenar de gravados en distintas técnicas asinados polo xenio malagueño entre setembro de 1930 e xuño de 1936) e coas ilustracións de “Dafnis e Chloé” ideadas en 1954 por Vertès, gravador de orixe húngara afincado en París que, como no caso dos mestres galegos, tamén desenvolveu unha obra con indubidables referencias picassianas.

A selección de obras desta exposición articúlase en torno ao denominador común da estética, mais tamén presenta un fío condutor cívico, do que a mostra toma o seu nome. En distintos puntos xeográficos, os catro artistas coñeceron a experiencia do exilio e compartiron unha visión moderna do humanismo.

“Un humanismo moderno. Colmeiro – Seoane – Picasso – Vertès” ofrece ata o 20 de xaneiro case que dous centenares de obras de catro artistas imprescindibles para comprender as correntes de vangarda do século pasado. A mostra pode ser visitada na Casa das Artes, na rúa Policarpo Sanz 15.

Descargar todas as imaxes