Escoitar

Abel Caballero inaugura o primeiro encontro Fortalece o teu Talento, con case medio millar de asistentes

A xornada, organizada por Inserta Emprego e a Fundación ONCE, busca poñer en valor a formación para o emprego dentro dun entorno de transformación dixital. O alcalde eloxiou o contido deste "gran evento" e felicitou aos organizadores.

xoves, 19 set 2019
1568897545once.jpeg
No Pazo Os Escudos, máis de 400 asistentes participaron este xoves no primeiro encontro Fortalece o teu Talento, organizado por Inserta Emprego e Fundación ONCE, co cofinanciamento do Fondo Social Europeo e o obxectivo de poñer en valor a formación para conseguir un emprego, así como a necesidade da formación continua para a mellora laboral, dentro do novo ámbito que supón a transformación dixital das empresas e os postos de traballo.

Abel Caballero felicitou aos organizadores por este "gran evento" e puxo de manifesto a necesidade de ter traballadores formados nunha sociedade absolutamente dixital: "a sociedade cambiou radicalmente os procesos produtivos, e iso supón un gran cambio ao que nos temos que sumar", dixo o alcalde, quen afirmou tamén que hai uns anos a "diversidade non se integraba no aparello produtivo, cos seus dereitos e obrigacións", algo que afortunadamente xa non é así. "As políticas sociais xa non son o que eran, agora son outra dimensión, estamos a borrar a palabra integración", engadiu.

Ao termo da inauguración, José Manuel García Oróis, xerente da Cámara de Comercio de Pontevedra, Vigo e Vilagarcía de Arousa fixo unha radiografía do emprego e os sectores máis demandados en Vigo e Galicia, facendo fincapé na necesidade de contar con competencias dixitais para os novos postos de traballo, "algúns deles están mesmo sen crear", explicou.

Posteriormente, celebrouse un debate no que houbo gran participación do público e que contou coa activa colaboración do Mago Murphy. Ademais da necesidade de que exista máis formación práctica e orientada á empregabilidade de persoas con discapacidade, púxose de manifesto, entre outros aspectos, a necesidade de contar con postos de traballo a media xornada, dado que existen moitos candidatos que non poden traballar durante unha xornada completa, aínda que se poderían facelo dedicando menos horas. A necesidade de que as empresas respondan a estas demandas e adapten os postos de traballo, recibiron grandes aplausos e ovacións.

O achegamento aos sectores representados na parte de mentorización, permitiu aos asistentes coñecer dunha forma máis detallada as necesidades de cada un deles, as posibilidades de empregabilidade e a formación demandada en cada empresa, incluíndo as áreas de traballo propias das compañías. Os relatores coincidiron en sinalar que en certos perfís os responsables de recursos humanos valoran máis a formación que a experiencia dos candidatos, xa que "nestes momentos vivimos inmersos nun mercado laboral altamente cambiante". Tamén destacaron a necesidade de preparar as entrevistas de traballo, unha garantía para evitar os nervios e causar unha impresión errónea.

Tras o xantar desenvolvéronse cinco actividades prácticas onde os asistentes puideron probar de primeira man as técnicas de formación máis avanzadas e innovadoras, ademais de coñecer todas as posibilidades para o seu desenvolvemento formativo e lograr os retos da empregabilidade do futuro. Unha destas actividades contou con dous simuladores de realidade virtual. O primeiro deles era un simulador dunha máquina de movemento de terra (pa cargadora ou retroexcavadora) en cabina completa, con plataforma de movemento e feedback na condución. O outro, o LOGSIM OYD, era un simulador de carretilla elevadora con lentes de VR situado nun posto de manexo desde unha mesa. A dixitalización, a gamificación e a necesidade de continuar coa formación, mesmo se os candidatos conseguen un contrato de traballo, foron os temas centrais destas actividades.

Fortalece o teu Talento nace co obxectivo de promocionar a formación e mentorización de persoas con discapacidade, no marco da execución e xestión do Programa Operativo de Inclusión Social e de Economía Social, cofinanciado polo Fondo Social Europeo. Con tal fin, Inserta Emprego e Fundación ONCE organizan dous encontros, un en Vigo e outro en Xixón. As persoas interesadas en asistir á próxima xornada poden realizar a súa inscrición na web www.fortalecetutalento.es
Descargar todas as imaxes