Escoitar

A rúa Príncipe acollerá unha exposición de 38 fotografías de Sebastiao Salgado

Entre o 23 de febreiro e o 23 de marzo a rúa Príncipe acollerá a exposición de Sebastiao Salgado "Génesis Arte en la calle", unha mostra que selecciona 38 imaxes dunha mostra formada por 245 fotos deste autor brasileiro, fillo dun emigrante galego.

luns, 20 feb 2017
O goberno local autorizou esta mañá a ocupación de parte da rúa Príncipe para albergar a exposición Sebastiao Salgado "Génesis Arte en la calle, promovida pola Obra Social La Caixa. Trátase dunha selección de 38 imaxes dunha mostra que reúne 245 documentos gráficos en branco e negro que o autor captou en máis de trinta viaxes por todo o mundo. O autor, brasileiro e fillo dun emigrante galego, é un dos artistas fotográficos máis recoñecidos.

Na mesma Xunta de Goberno local deuse luz verde á constitución das comisións de selección de beneficiarios da primeira quenda do programa municipal Vigo Emprega, que serán elixidos nun prazo dunha semana. O Concello adica 869.000 euros para a primeira parte do programa, orzamento que permitirá a contratación de 128 profesionais de distintos campos: auxiliares administrativos, capataces, oficiais albañís, carpinteiros, fontaneiros, xardineiros, peóns xardineiros-forestais e da construción, entre outros.

O persoal beneficiario do programa municipal -que procede do Servizo Público de Emprego- será preferentemente de colectivos con dificultades de inserción laboral, como discapacitados, menores de 30 anos e maiores de 45, mulleres e parados de longa duración.

Caballero avanzou que os traballadores e traballadoras contratados farán obras útiles para a cidade, como a construción de beirarrúas, limpeza de maleza en parroquias, melloras no Parque Central e en zonas verdes. O rexedor vigués fixo especial fincapé nas reformas que acometerá o persoal do "Vigo Emprega" en colexios, como por exemplo ampliación de comedores escolares e o acondicionamento dos baños nos colexios Balaidos, Eduardo Pondal, Santa Tegra, Carballal, Pardo Bazán, Carrasqueira, Valadares Igrexia, Lope de Vega, Vicente Risco, Escultor Acuña e Canicouva.