Escoitar

Iolanda Veloso salienta a traxectoria en igualdade de Vigo e destaca a importancia de reflexionar sobre a súa implantación

A concelleira de Igualdade, Iolanda Veloso, clausurou este luns as Xornadas sobre Implementación de Plans Locais de Igualdade, que se celebra en Vigo organizado polo Instituto da Muller e a Federación Española de Municipios e Provincias. Na súa intervención, a concelleira nacionalista salientou a traxectoria en igualdade do Concello de Vigo, que no ano 2009 ano aprobou o seu cuarto `plan de igualdade, que contempla 104 medidas concretas para acadar a igualdade real entre homes e mulleres.

luns, 7 feb 2011
1297087735igualdade.JPG
Iolanda Veloso afirmou que as administracións locais son as primeiras que teñen que "dar resposta ás necesidades das mulleres", polo que fixo fincapé na importancia de reflexionar sobre a posta en marcha dos plans de igualdade e o impulso das medidas de conciliación. Neste sentido fixo referencia á consideración de Concepción Arenal segundo a cal "todo o mundo fala de igualdade pero non todo o mundo quere dicir o mesmo".

A concelleira de Igualdade recoñeceu que hai moito camiño xa percorrido, aínda que apuntou que a medida que se avanza aparecen novos problemas. "Non só é necesario o cambio das mulleres, senón de todo o mundo; é preciso cambiar os esquemas de cara a acadar unha sociedade máis democrática, igualitaria e xusta". asegurou.

No caso de Vigo, a edil nacionalista afirmou que se trata "dun concello privilexiado", por contar cun traballo previo e un movemento asociativo que propiciou o cambio de moitas cousas e un orzamento "razoable" en comparación cos municipios da comarca. Finalmente, agradeceu a todas as persoas asistentes ás xornadas, así como á organización das mesmas.
Descargar todas as imaxes