Man Xornal.vigo.orgXornal.vigo.org Concello de Vigo Contacto
Discurso
Subscribirse


 
sábado, 17 de maio 2014

Imprimir | Enviar

BANDO DIA DAS LETRAS GALEGAS (2014)
Dedicado a Xosé María Díaz Castro


Por Uxía Blanco (actriz)

Cidadadanía de Vigo:

Hoxe celebramos a forza do galego, o idioma que nos permite comunicación, negocios e amor con 235 millóns de persoas espalladas polo mundo. O coñecemento do galego e do castelán dános a chave da comunicación con toda Iberoamárica. Pero tamén con países lusófonos noutros continentes.


Vigo abandeirou o orgullo galego dende o berce. Na imprenta de Juan Campañel, na rúa Real , viu a luz Cantares Gallegos de Rosalía de Castro, un lóstrego na noite da nosa lingua.

E foi un vigués. Fernández del Riego, quen lle propuxo á Real Academia celebrar o Día das Letras Galegas en conmemoración do centenario da publicación deste poemario de Rosalía. Por iso dende 1963 vimos celebrando o 17 de maio.

A nosa cidade continuou sendo punta de lanza con empresas imprescindibles: Editorial Galaxia, Edicións Xerais, A Nosa Terra, Ir Indo... que publicaron sempre en galego.

A sociedade viguesa, inmersa hoxe nunha dramática crise de traballo , sanidade, educación.... pode presumir dunha solidariedade acubillante. E neste caldo de cultivo estase producindo un interesantísimo rexurdimento cultural.

A nosa pertenza a unha terra oceánica e cunha lingua propia identifícanos e proxéctanos ao universo.

Sabíao moi ben Xosé María Díaz Castro, lugués, poeta telúrico, pertencente á nosa tribu, que con só un libro Nimbos, foi capaz de transitar polo ser humano, os sentimentos, a vida, o amor e a morte, cunha selección de léxico elegante e sinxelo no que non desbota dialectalismos e ruralismos:

Un paso adiante e outro atrás Galiza/
Sede de xustiza que nos queima/
sede de lus.
Longa rúa de mar/

Hoxe Vigo ferve. Se os 80 foron anos da Movida viguesa, agora estamos no alboreo dunha nova ceifa. Grupos de mozos e mozas están a traballar na música, na imaxe, na literatura, na pintura, no cine...

A forza do propio, do auténtico é o que "vende". Unha marca propia. Non podemos competir con outras culturas tratando de imitalas. Pero si podemos sorprender dende a nosa diferenza, a nosa paisaxe, as nosas historias e a nosa lingua.

Lembremos outro vigués, pioneiro do galego no audiovisual: Chano Piñeiro. A súa película Mamasunción en galego e rodada nuha aldea, obtivo o primeiro premio en festivais de España, Francia, Australia, América…
Vigo foi tamén pioneira en celebrar a estrea, hai 25 anos, das tres primeiras longametraxes en galego: Urxa, Continental e Sempre Xonxa, no inesquecible cine Fraga de Vigo.

Dicídelles aos vosos fillos e fillas que van polo mundo que poñan no seu curriculum o idioma galego porque sabemos de enxeñeiros en Alemaña que están a traballar en temas internacionais : Alemaña-Brasil, grazas ao coñecemento do galego.

Hoxe tamén celebramos o día internacional de Internet.
É ben curioso que coincida co Día das Letras Galegas. Invítovos a botar as redes tecidas con palabras galegas.
Usemos a rede para afirmar e espallar a creatividade da nosa poesía, ensaio, novela, cómic, música, cine, todas as artes....en galego.
A proposta é inundar o facebook. Que chovan palabras galegas sobre as pantallas de todo o mundo coma un maná alimenticio.
Whatsappeemos na nosa lingoa.
Que arda internet ao son dos aturuxos galegos!

Un paso adiante e outro atrás Galiza, dicía Xosé Maria Díaz Castro.
Fagamos entre todos que se sinta orgulloso de nós e que poidamos abreviar o seu verso:
un paso adiante Galiza


Uxía Blanco


Outros discursos
Discurso do Alcalde Reconquista 2018

Bando Reconquista 2018

Bando Día da Constitución

Discurso do alcalde de Vigo
Día da Constitución 2017


Bando Día de Galicia

DIA DE GALICIA en VIGO


Ver todos


Volver á portada

© Gabinete de Prensa - Concello de Vigo 2003